Sugob ni Longino: An Save.Family Movement (02-20-08)

An nakalabay nga kalamidad dinhi han aton probinsiya han Sinirangan Samar in nakapagpahinumdom na daman han kadam-an ha aton han Diyos. Kadam-an kay siguro ha butnga han mga rimalaso may-ada la gihap diri nababantad labi na adton mga diri gud apektado han ura-ura nga uuran ngan babaha. Angay gud nga permi may pahinumdom mahitungod han presensiya han Ginoo para la makapanmalandong an mga tawo nga may-ada Makagarahum han ngatanan nga angay tagan hin importansiya dida han aton mga kinabuhi. 

***

Tungod liwat hini nga kalamidad nakit-an naton an kakulang hi kaandam han mga komunidad nga malikyan an mga rimalaso nga dara hini. Usa daman ini han mga kamatuoran nga an mga Pinoy, upod na an mga Estehanon, ura-ura it kumpiyansa. Basta wara pa problema, sugad hit permi la maupay it kinabuhi. Niyan na kita pakakahunahuna hit mga kinahanglan ngay-an nga andamon kun aada na iton problema. Haros waray naton preparasyon kun mag-uunan-o kun naabot an mga rimalaso. An aton na la an pag-gi-os kun ano iton mahihimo kun may-ada na mga nanhihinabo. Unta mabag-o na ini nga aton kustombre ngan sistema. Kay waray mamaupay han kaandam bisan pa giupayi iton sistema hiton pagbaton han problema. 

***

Sanglit usa ini han mga butang nga aton igin-uupod han aton pag-gi-os nga masalbar an kada pamilya ngan an pamilya mismo. Kumbaga ini nga aton gintikangan nga pagtirok hin pondo nga gintawag naton nga Save a Kidney, Save a Family Fund in usa la nga pagtikang ngadto hin mama-importante nga buruhaton nga asya manggud an katuyoanan hini nga aton paglaygay han importansiya han pamilya. Ini an pagtukod hin organisasyon nga matutuok gud han pagpadukwag, pagprotehir ngan pagsustenir han pamilya komo batakan nga institusyon han sosyedad, an siyahan nga eskoylahan, an guti-ayay nga singbahan. Ini an aton tatawagon nga Save.Family Movement. Kun iyo ginsundan an aton Sugob, hadto pa nga nakalabay nga tuig aton na gintikangan an pagtukod han pundasyon hini nga organisasyon. Igpapadayon naton an aton pagpahimugso hini nga grupo basi matagan hin atensyon an iya importansiya dida han aton mga kinabuhi ngan han sosyedad. 

*** 

Kay kun iton pamilya in mapaparig-on ngan mahibabalik han iya harangdon nga lugar dida han sosyedad, piho ako nga mababag-o an dagway han aton kalibutan. Kun aton la igbabalik an kaangayan nga pagtagad han pamilya mahibabalik daman an mga mag-upay nga mga pamatasan ngan mga balyu (values) nga ha pagkayana in sugad hin nahingangalimtan na. Damo iton mga nakakahibang han aton pamilya sanglit damo gihapon an trabahoon nga aton inaatubang. Aada an mga aspeto han relihiyon, pulitika, ekonomiya, edukasyon, relasyon, ngan iba pa. Importante kaupay mabaton ngan matagan hin solusyon ini nga mga butang basi magin maupay ngan marig-on na daman an tagsa nga pamilya ngan magin sustenado an katuhayan han tagsa nga komunidad ngan han bug-os nga sosyedad. 

*** 

Iton aton katuyoanan an pagkamay-ada usa nga mamaupay nga komunidad nga nasarig dida han ginparig-on ngan ginpabag-o nga tradisyonal nga pamilya nga ginporma pinaagi han balanse nga pagpauswag han ngatanan nga aspeto han sosyedad. (A better community established upon a strengthened and renewed traditional family formed out of the balanced development of all the aspects of society.) Kumbaga ini an aton vision o ginhihingyap nga makab-ot. Ngan an aton mission o an pamaagi basi matuman ini amo an pangkabug-osan nga pagplano, pag-implementar, pag-monitor, ngan pag-evaluate han mga programa, proyekto ngan mga buruhaton nga an katuyoanan amo an balanse nga kauswagan basi magkamay-ada mamaupay nga komunidad nga gintukod dida han ginparig-on nga pamilya. (The holistic planning, implementation, monitoring and evaluation of projects, programs and activities geared towards balanced development for a better community with the family as the institution of fundamental undertaking.)

 *** 

May mapakiana kun kay-ano nga aton gintatagan hin duon (emphasis) an tradisyunal (traditional) nga pamilya. Ini in aton ginbubuhat basi diri kita mawara han kamatuoran nga an institusyon han pamilya in ginkokomposo hin amay nga lalaki, iroy nga babaye ngan kabataan nga tawo. Asya ini an pinakabatakan nga komposisyon han pamilya. Danay upod an mga kaapoyan ngan iba pa nga mga kauropdan. An iba nga mga komposisyon diri naton gintatawag nga pamilya sugad han aton paghatag hin importansiya han tradisyonal ngan orihinal nga pagkilala han pamilya. 

***  

Agud matuman ini nga aton vision-mission, an organisasyon in naghihingyap nga makab-ot an masunod nga mga katuyoanan o goals: 

1.       Pagpakusog ngan pagprotehir han tradisyunal nga pamilya ngan preserbaron ngan igpasamwak an iya bahin, mga responsibilidad ngan mga buruhaton komo batakan nga institusyon han sosyedad, siyahan nga eskoylahan ngan guti-ayay nga singbahan. (Strengthen and protect the traditional family and preserve and promote its role, function and responsibility as the basic unit of society, the first school and the domestic Church.)

2.       Talinguhaon nga masusteniran an pagkaurosa han pamilya ngan magpugos nga magin bug-os an pamilya basi diri ma-isakripisyo an mga pamatasan o mga balyu nga nakakaparig-on han sosyedad. (Conserve the unity of the family and strive to keep the family together to the point that no member of the family need go somewhere else, particularly abroad, just to earn and sacrifice the family values that keep society stable.)

3.       Himoon an pamilya, ngan tagsa nga miembro hini, nga magin kusog ngan konsensiya nga magduduso han sosyedad ngadto hin ungod-ungod ngan hul-os nga kauswagan ngan progreso. (Make the family, and each member of it, as the dynamic energy and the moral fiber that would boost the society towards true and full development and progress.)   

***                       

Pira han mga buruhaton nga aton ginhuhunahunaan basi magin manilampuson ini nga mga katuyoanan amo an pagkamay-ada mga pag-aram ngan mga karokatingog basi mahibaruan kun ano ba ini nga mga bahin, responsibilidad ngan mga buruhaton han pamilya basi magin marig-on nga pundasyon han sosyedad upod na an pangaro suporta han mga ahensiya ngan mga organisasyon nga makakahatag hin kalamragan mahitungod hini nga mga butang; pagkamay-ada mga proyekto, programa ngan mga buruhaton nga makakapukaw han kooperasyon ngan interes ngan makakasustenir han pagparig-on han pamilya, an pagtukod hin mga pakabuhian labi na pinaagi hin mga ungod nga kooperatiba ug an pag-establisar hin mga pondo nga makakabulig han mga miembro ha takna hin mga ura-urada nga mga panginahanglan; ngan an pagtanom ha tagsa nga miembro han pamilya han importansiya han panginlabot diri la han kalugaringon o kinalugaringon nga mga plano o panginahanglan kundi han kanan kadam-an mga program, proyekto, buruhaton ngan mga panginahanglan, an kaupayan han pagin andam maghatag hin serbisyo nga waray kabalyo nga salapi o butang, ngan an pagbulig ha ira nga magin andam para hini nga mga okasyon pinaagi hin mga training, seminar, retreats ngan iba pa. 

*** 

Kay-ano nga ginbubuhat ngan pagbubuhaton naton ini? Kay maaram ako nga an tagsa ha aton naghihingyap hin kabag-ohan ngan kaupayan kundi naghuhunahuna nga waray mahihimo tungod kay nag-uusaan. Sanglit ini na an okasyon. Pagkaurosa kita, pagburublig ngan pag-gitapod-tapod. Bisan ngani an usa la nga bato nga iginlalabog ha dagat nakakahimo hin mga gudti-ay nga pagbalud. Asay pa iton darudamo nga bato nga dudrongan nga iglalabog? Kun an usa nga tawo puede makahimo hin kabag-ohan han kalibutan pinaagi han pagbag-o han iya kalugaringon, ano pa daw la kun darudamo na nga tawo an magbabag-o han tagsa nga kalugaringon ngan magkakaurosa nga magkamay-ada mamaklaro nga kabag-ohan han komunidad ngan han sosyedad? 

*** 

Na-oobserbaran naton ha mga telebisyon nga damo an natagusya kan Jun Lozada. Pero may-ada daman mga tawo nga nasiring nga nagpipinakaupay-upay la hiya o bangin waray la katagi hin kickback. Di kita maaram hit bug-os nga kamatuoran pero ha takna nga igin-gahin han Diyos magawas gihapon an bug-os nga kamatuoran. Ngan magawas la iton kamatuoran kun an tagsa ha aton magi-os basi makakontribwer hini nga buruhaton. Ayaw la kita paghinulat kun ano an mga hinanabo ha sosyedad, bulig kita han pagbabag-o han kalibutan. Sobra nga idealismo? Diri. Ini an pag-atubang han kamatuoran nga kun diri kita magi-os, waray kaupayan nga hinanabo han aton mga kinabuhi. Ayaw kita pagsugad kan Juan Posong nga naghinulat la han kahulog han bayabas.  

***

Karuyag ko la pasalamatan in usa nga igkasi taga media, hi Mr. Roy Calvo. Iya ako hini ginpahuram hin usa nga produkto nga may kantidad nga P 800.00. Pakabasa niya han Sugob han nakalabay nga semana nagtext dayon hiya ngan nagsiring nga diri na la niya susukton an bayad hadto nga produkto basi makabulig han aton hungyap. Damo nga salamat, Sir Roy! Bale ini nga kantidad an siyahan nga pondo han aton Save a Kidney, Save a Family Fund. Salamat daman han mensahe nga iginpadara ni Mr. Cedric Solidon pinaagi han email nga pag-ampo para han padayon nga kahimsog han panlawas han iyo ubos nga sangkay. 

***

May-ada daman naton usa nga nagsusunod han aton Sugob nga nanginginahanglan hin mga libro nga may tema nga thriller, detective ngan love stories. Kun hin-o man an may-ada maibabaligya nga sugad hini nga mga libro, kontaka la an iyo ubos nga sangkay. Sugad han aton pinangangaro, kun magbaligya kamo pinaagi hal aton mantalaan, unta mahingada han Save a Kidney, Save a Family Fund an palit basi maiatipoi iita hin pmndo papa hal aton katuyoanan nga makabulig han mga kabugtoan naton nga aada hin mga rimalaso han kinabuhi ngan waray kapas mabaton an ira mga kakurian. 

***           

Para han iyo mga komento, suhestiyon, paki-ana, reaksiyon, ngan iba pa, aadi an aton email address: es.reporter@gmail.com ngan save.family.movement@gmail.com . Puede gihapon ako niyo makontak ha numero 0921-4946612 ngan ha mga email addresses nga lance.meryes@gmail.com , ngan pilgrimlance@yahoo.com. An iyo tambulig in dako an mahihimo basi masalbar an iyo ubos nga sangkay tikang han mamagrabe nga sakit ha kidney ngan magigin tinikangan ini han aton pakabulig han iba pa naton nga mga kabugtoan nga nagkukuri dara han sakit ug kapobrehan. Damo nga salamat ngan bendisyonan kita ngatanan han Makagarahum nga Diyos!

_________

I am also inviting you all to visit

http://save.family.movement.googlepages.com/home and

http://saveakidneyfund.googlepages.com/home

===

Lance AC Acampado A dedicated family man, a former cadet, an ex-seminarian, youth minister, public servant, blogger and regular contributor to the Eastern Samar Reporter.