Sugob ni Longino: Save a Kidney, Save a Family

 Sugob ni Longino is a regular column of Lance Alberto Clarito Acampado at the Eastern Samar Reporter, a newsweekly published by the EV Mail for the people of Eastern Samar. This article will appear this coming week - an article inspired by having kidney stones and for having experienced the difficulties of medication with limited finances. Hopefully he will again be able to contribute regularly to the Sinirangan.com.
 

Padayon an kinabuhi ha butnga han damo nga mga ayat nga aton inaatubang. An iyo ubos nga sangkay in ginkinahanglan pagbutangan hin stent ha kidney basi magin normal na daman an pagtrabaho hini nga parte han aton lawas. Tungod hini iginhiagi kita hin dako nga kagarastusan nga ha butnga han kamutangan han akon pamilya yana in medyo madudoy. Kundi salamat hadton mga tawo nga nagpaangbit han ira mga tambulig. An Diyos na an labi nga maaram kun hin-o ini hira nga mga tawo ngan diri ko karuyag nga mawara an grasya nga angay hingada ha ira tungod han ira ginbuhat. Bisan kun ha katapusan hin tulo ka bulan mabalik na daman an iyo ubos nga sangkay ngadto ha ospital basi tanggalon an iginbutang nga stent ha akon tuo nga kidney, nga nangangahulogan na daman hin kadugangan nga gastos, pasige an aton pagmalahimo han aton mahihimo basi makabulig han mga katumanan han pag-ciudad han Borongan. Ha aton guti-ay nga paagi, padayon an aton pagtuman han kaangayan nga mga buruhaton basi magin mahinungdanon an pag-ciudad han Borongan ngan makabulig han mga pamilya sugad han aton na gintikangan. 

***

Bisan kun madudoy diri la ha lawas kundi pati ha bursa an ighiagi kita hin sakit, nakakabulig daman ini nga mahinumdom kita nga an kinabuhi in waray gud man kasiguradohan labot han kamatuoran nga ha butnga han ngatanan, an Diyos an labi nga matatapuran. Ambot kun kay-ano nga nga kadam-an ha aton in kinahanglan pa ighiagi hin mga rimalaso ha kinabuhi basi la hinumdom nga may-ada Diyos nga nahigugma ngan nanginginano han Iya mga anak dinhi ha kalibutan. Ambot kun kay-ano nga kadam-an ha aton niyan la hibabaro pagtawag ha iya kun aada hin  mga problema nga ginhuhunahunaan naton nga diri na maaatubang o masosolbar han tawo la. Ambot kun kay-ano nga kinahanglan pa nga bantaron kita Niya hin magkadiro-dilain nga paagi sugad han kasakit basi bumalik ngan kumusog an aton pagtoo ha Iya.  

***

Ha butnga han akon inabat nga suol ngan han takna nga nagkukulang an amon kwarta nga kinahanglan basi mabaton an akon panginahanglan, binalik ha akon an akon mga hingyap han batan-on pa ako nga makabulig han akon igkasi tawo ha ano man nga pamaagi. Ugaring kay ha dalagan han panahon danay kita nahingangada hin kamutangan nga an aton na la ginhuhunahunaan amo an aton mga kalugaringon nga mga kinahanglanon, o adton mga butang nga para ha aton in makakabulig han aton mga kalugaringon nga mga intereses. Nahingangalimot kita han mag-upay nga mga larang ngan mga ungara han nakada pa kita han estado han idealismo – nalulumos kita han realismo han kalibutan nga danay diri ngay-an asya an kaangayan nga dalagan han mga butang dara nga diri nasubay han kamatuoran. Sanglit ha butnga han mga kakurian nga akon gin-agian nakasiring ako nga siguro panahon na nga tumanon ko an mga larang nga akon pagkita in makakabulig han akon igkasi-tawo. 

***           

Damo an aton mga kabugtoan nga iginkukuri diri la tungod han sakit kundi tungod han kapobrehan – tungod han kawara kapas nga ira mabaton an kinahanglanon nga pitad nga maipatambal an ira mga sakit ngan masolbar an ira mga kasakitan. Han takna nga naatubang kami han kawara pinansiyal nga kapas nakita ko nga makuri an makaaro hin usa la nga institusyon o tawo basi mabuligan kami han amon ginkikinahanglan. Salamat sa Diyos, pira nga mga tawo an amon naaruan hin bulig ngan nakita ko nga ha talagudti nga mga tambulig, an dako nga kantidad nga angay matirok in diri na makuri matagamtaman. Tungod kay magkikinahanglan na daman an iyo ubos nga sangkay hin darudako nga kantidad basi makumpleto an akon pagpatambal, nahunahunaan ko nga tikangan ha yana pa la an pangaro hin bulig hadton mga tawo nga ha akon hunahuna in may-ada gihapon hingyap nga makabulig kundi diri pa napupukaw an kamabaskog han kaisngkaisng nga magpaangbit han ira mahihimo, sugad ha iyo nga nagbabasa yana hini nga aton taramdan. Ha akon simple nga paagi, karuyag ko matikangan ini nga akon pangaro hin bulig ha ilarom hin programa nga ginhuhunahunaan ko nga pagngaranan nga Save a Kidney, Save a Family Fund. 

*** 

Kay-ano nga suga hini an akon igngangaran? Karuyag ko magkamay-ada koneksyon an aton na natikangan nga hingyap nga makabulig han pamilya nga magin makusog ngan mahibalik han iya poder komo batakan nga instutusyon ha sosyedad. May-ada gad masiring nga ginbubuhat ko ini tungod nga ako man an siyahan nga benepisyaryo. Pero bisan kun hi ako an siyahan nga makakatagamtam hini nga pondo, sidngon na la naton nga tungod han bendisyon hini nga pondo an kinabuhi han iyo ubos nga sangkay in sigurado naman nga ighahalad basi magin manilampuson pa ini nga aton pagtitikangan nga buruhaton. Ngan mamadamo pa nga katawhan an makatagamtam han grasya han katalwasan tikang ha sakit man, o kapobrehan. Sanglit ini in diri la personal an katuyoanan. Ini in usa nga pitad basi mabuligan naton an mamadamo pa nga mga pamilya nga nag-aagi hin mga kakurian. Karuyag sidngon, katumanan daman ini han aton hingyap nga makabulig gud man han mga pamilya nga nagkukuri nga aton na gintikangan pag-iristoryahan han nakalabay nga tuig pa la. 

***                       

Kay labot la hini nga pagmalabaton han aton sakit, damo pa nga mga proyekto ngan mga programa an ginlaladngan han iyo ubos nga sangkay. Ha masunod nga mga semana in pag-uusa-usaon naton ini nga mga plano basi mahibaro kamo nga diri gud man para la han personal nga katuyoanan ini nga fund raising han iyo manurugob. Ini in nagtutuyo daman nga pakusgon an pamilya, parig-onon an komunidad ngan pauswagon an sosyedad. Kun magkakaurosa, magbuburublig ngan mag-gigitapodtapod kita, piho ako nga ha diri maiha nga panahon matutuman ini ngatanan subay han mga larang ngan pagtuyang han aton Makagarahum nga Amay. 

*** 

Ngan ha siyahan nga pitad, karuyag ko igpasabot nga diri la direkta nga pangaro an bubuhaton han iyo ubos nga sangkay. May-ada ko gihapon pipira nga mga mga libro ngan gamit nga siguro in puede ko ig-oksyon o igbaligya ngadto han mga intresado ngan karuyag makabulig. Kumbaga, igbabaligya ko ini nga mga libro o gamit ngadto han mga tawo nga may kasingkasing nga makapagpaangbit daman han ira hiagi o karikuhan bisan kun guti-ay. An importante matikangan naton an buhat nga makabulig. Kay ha maabot nga panahon piho ako nga magigin usa ini nga maupay nga buruhaton kay diri la ini kanan tawo plano, an Diyos an mag-gigiya hini nga buruhaton kay para ini han iya mga anak, ngan han iya mga hinigugma nga mga pamilya. 

*** 

Sanglit kun may-ada niyo mga higayon, an siyahan ko nga karuyag igbaligya pinaagi hini nga aton mantalaan amo an lima nga libro han serye han Harry Potter nga akon napalit sakob han siyahan ko nga mga tuig han akon pagserbisyo han Borongan. Naabot hin P 5,000.00 an orihinal nga pagpalit hini nga mga libro. Kun hin-o man an intresado, tawagi o i-text la ako han akon numero o kontaka daman ako han akon email address ha ubos. Ini nga mga libro amo an siyahan nga upat nga libro ngan an ikaunom. 

***

May-ada ko daman usa ka set nga Grolier Encyclopedia, 2002 edition. Bisan kun maiha na, magagamit pa gad an mga impormasyon hini ngan diri ini hiya gamit kay gintitinago la in hiya. Naabrihan na gad an iba nga mga volumes pero sugad la gihap han orihinal an ita hitsura. An orihinal nga kantidad pagpalit hini nga mga libro in naabot hin P 13,000.00.

*** 

Adto naman nga andam maghatag gihapon han bulig, diri kinahanglan nga an iyo ighatag in cash o kwarta. Puede gihapon kamo magbaligya hin iyo diri na ginagamit o ginkikinahanglan nga butang o gamit pinaagi hini nga aton mantalaan ngan taramdan ngan an palit o bayad in mahingangada han aton pondo. An importante iton aton katuyoanan an pagburublig. Diri la ini para han iyo ubos nga sangkay ngan han akon pamilya kundi han iba pa nga mga pamilya ngan katawhan nga nagkikinahanglan kay maaram ako nga ini nga aton buruhaton in usa la pagtikang ngan maabot an takna nga makakabulig kita hin mamadamo pa nga mga tawo. 

***

Kun may-ada gihapon mga buhatan nga intresado magbutang hin mga donation box nga may nakasurat nga Save a Kidney, Save a Family Fund para hini nga aton katuyoanan, alayon la pagkontak han iyo ubos nga sangkay. Masisiguro naton an katumanan han aton katuyoanan kun magkakaurosa kita ngan magbuburublig ha ngatanan nga mga paagi nga aton mahihimo. An importante, an guti-ay naton nga mga tambulig ngin natitirok in nagigin dako ngan nakakahimo hin milagro para hin usa nga tawo, para han iya pamilya, ngan para han komunidad. Salamat na la nga daan han ngatanan nga magpapaangbit han iya o ira bahin hini nga buruhaton. Sigurado ako nga kun hi kita in magkakaurosa ngan magbuburublig damo nga mga milagro an hinanabo para han aton mga kabugtoan nga nagkukuri tungod han sakit ug kapobrehan. 

***            

Para han iyo mga komento, suhestiyon, paki-ana, reaksiyon, ngan iba pa, aadi an aton email address: es.reporter@gmail.com . Puede gihapon ako niyo makontak ha numero 0921-4946612 ngan ha mga email addresses nga lance.meryes@gmail.com , ngan pilgrimlance@yahoo.com. An iyo tambulig in dako an mahihimo basi masalbar an iyo ubos nga sangkay tikang han mamagrabe nga sakit ha kidney ngan magigin tinikangan ini han aton pakabulig han iba pa naton nga mga kabugtoan nga nagkukuri dara han sakit ug kapobrehan. Damo nga salamat ngan bendisyonan kita ngatanan han Makagarahum nga Diyos! 

===

Lance AC Acampado A dedicated family man, a former cadet, an ex-seminarian, youth minister, public servant, blogger and regular contributor to the Eastern Samar Reporter.