Surat para kan Jun Lozada tikang ha iya Anak
February 29th, 2008 | by Fhen Macabasag |Itay, nagsusurat ak’ yana ha imo
tungod nga karuyag ko masayoran
hinin akon kinawuwurokan:
Kay ano yaada ka ha telebisyon
ug kami nagtatago?
Mayda ka ginpasamwak, hi Dada nagyakan,
usa nga malagutob nga kamatuoran:
Dida han NBN-ZTE nga kontrata
overprising an badyet dinhi.
Siring ni Inay, putli an im’ tinguha
an nagdesider asay gud an konsinsya
kay diri akos han imo kalag
mga buwa nga istorya an ipadayag.
Nagteks an mga suok ko nga klasmeyt
bag-o nga bayani ka daw han at’ nasyon
usa nga Pilipinhon nga susbaranan
tim-os nga nagseserbi para ha kadam-an.
Ugaring Itay di ko matukib ini:
kun kay ano nga yaada ka ha T.V.
ug kami han pamilya nimo
yaadi pirme nagtatago…
===
Fhen Macabasag Fhen Macabasag is a well-rounded Waraynon. His art is his life.
2 Responses to “Surat para kan Jun Lozada tikang ha iya Anak”
By jonats on Mar 4, 2008 | Reply
from jun l.
pasensya na anak
nagtatago kamo;
akon usa nga pamilya
nagseselos ha iyo.
pasensya na daman
ha tv ko inamin
akon pambabaye
akon la ginproprotektahan
reputasyon ko
akon pagkatangkod
pasensyan na daman
mabalhin kamo hin eskoylahan
tikang ha lasalle ngadto kabikolan
para la kamo maprotektahan
ngan diri na masilip aton karikohan
ayaw kamo kahulop
diri kamo pababayaan
mga pilipino ako inuugupan
mayda na natirok dos milyones kapesos
para di na makuha
akon kinurakot.
ayaw kamo suson
kay iton, “permissible zone”
pasensya na daman
By Fhen Macabasag on Mar 5, 2008 | Reply
Balos han usa nga Mambarasa han “from jun l”
Syahan, persona hiton nga “from jun l,”
mapirit an im sinasakob.
Pautro-utro an im pag-asoy.
Ha ikatulo nga linya
ha una nga stanza hini,
nagyakan ka hin “akon usa nga pamilya,”
samtang ha ikatulo nga linya han ikaduha nga stanza,
“akon pambabaye.”
Ini nga surat (diri siday)
waray liwat hiya stress.
Aw, bag-o ko makalimtan,
an pinakamapirit o pabalikbalik nga mensahe nim
asay an linya nga “pasensya na daman.”
Usa pa gihapon,
damo im theme/thesis.
Amo nga mawuwurok an mga mambarasa hini
sugad ha ak… =)
Mapakiana yana ako ha im’ persona hinin surat:
siday ba ini nga ginhulma ko?
o diri?