An Kanta Han Sabang
March 19th, 2008 | by Ben Alar |(Siday nira Andrea Amoyo Sagaoinit, Marilyn Sagaoinit Alar, ngan Ben Alar.)
Sabang nga baraan, salog nga Borongan
Asay gintikangan bungto nahingadnan
Madakmol nga borong kada kaagahon
Asay an tigaman hadton kadaanan
An sapa ha Bulhot angay nga tubtoban
Upod pa an Greenland, Canpinid ‘lilbungan
Tambak, Cancosipi ngan Tabok sugad man
Usa an yinaknan, Sabangnon ngatanan
Manghod katiopay an bungto ha Sawang
Hadton kaonahan an sentro an Sabang
May barracks pa ngani an mga sundalo
An mga sakayan dinhi an pagpondo
Hadto han damo pa an kahoy ha guba
Adton mga lancha dinhi gintutuha
Pantalan han Sabang ira duruongan
Maupay tagoan, gudti an bub-ongan
Panahon han lokad napondo an barko
Harani ha Ando marisyo an baryo
Adton mga lancha naghahakot hira
Lokad ha almasin damo nga kwarta
An anak han Sabang hi Amboy “Boaya”
Panahon han gyera lider han gerilya
Nagmayor han bungto katapos han gyera
Adton mga pilyo nahadlok ha iya
Kaupay nga hatag grasya nga langitnon
Tagitis han Sabang marasa kaunon
Darako an hubas ha panagitisan
Kahanap, kadayaw an gin-aandaman
Magab-i, maadlaw pirmi la maribhong
Babaye, lalaki, bata ngan tigurang
Kada usa hira may ada surudlan
Puno hin tagitis ira kalipayan
Malagsim nga sabaw wara kapareho
Damo an tagitis Marso, Abril, Mayo
Ha bog-os nga bungto bisan diin kadto
Ha Sabang la ini makikita niyo
Mag-osig nga ayam, masirom nga dalan
Di makakapugong han kaulitawhan
May tikang ha Lonang, Sawang, Pepelitan
Ira pasasginan an panagitisan
An ira tinguha an kadaragan-an
Hi Idak, hi Padang hi Dada hi Babang
Diri gud mabaya bisan pa umuran
Diri mapupuni bisan pa pag-isgan
Paglaom han Sabang kamo kabataan
Maupay nga ulo, bugway kalawasan
Iyo kabobwason asay pag-andaman
Harayo, harani kay mauli ka man.
===
Ben Alar
7 Responses to “An Kanta Han Sabang”
By Fhen Macabasag on Mar 19, 2008 | Reply
Kakan-o ini naisurat Mano Ben? =)
(Pakibasa na la han e-mail message ko ha imo. Salamat han pagpost.)
By atty carlito campo on Mar 20, 2008 | Reply
Dear Ben,
Maupay nga im siday, salamat, it traces back my roots ha sabang north, yadi ak yana ha bohol naka asawa hin boholana, taga Tubigon.
Keep up the noble work hionong hiton Hamorawon Spring naka lug-om ak hit dida han mayor pa hi Mimo Amboy. By the way osa ak hit nga bulig, opod nira Fr. Nilo, Pepit, etc. Hi mano carling campo, (an gi manghori nga bugto nira Mana Juling Campo-Rosales “hi bata”). More power to you…ihoring ak kan Angel Carpeso, nagkita kami han instilacion ni Bp Varquez, ngin magkita kamo, salamat…Mano Carling
By Ben Alar on Mar 22, 2008 | Reply
To Fhen M.,
1999 pa ini nga siday. Gin post ko dinhi yana ha okasyon han pagkamatay ni Dr. Enrico Villero nga nagin Punong Barangay ha Sabang North, hadto pa.
Mano Ben
- - - - - - - - - - - - - - - - - - - -
To Mano Carling,
Yes, I remmember you. Komusta ka na. Salamat hiton imo supporta ha Hamorawon Project ngan han imo pag karawat hini nga siday.
Pagsusumatan ko hi Padi Angel.
Ben
By Fhen Macabasag on Sep 16, 2008 | Reply
Ini nga “siday” in istorya han Sabang ha paghagos han panahon. An mga paragsiday nga nagsurat hini nag-asoy han memorable nga mga panhinabo ha nasabi nga barangay.
An tradisyon ha pagsurat ni Mana Andring, ha akon pagpinsar, namamana/nakukuha ni Mano Ben.
By NikNok_Cepeda on Nov 14, 2008 | Reply
grabe kaupay!!!
pestak paro lak hin kinaun hin tagitis. SALAMAT nga dako. .. Nahidlaw lak han pilihan and mga tambayan ..
hin hidlaw hit SABANG. Apo ak ni mano MAX ambot kun kumilala kam ha ak. didto ak dako ha sabang…
By Ben Alar on Nov 25, 2008 | Reply
Niknok,
Max Ballena ?
Ben Alar
By NikNok_Cepeda on Nov 29, 2008 | Reply
yes!