Sugob ni Longino (02-27)
March 30th, 2008 | by Lance AC Acampado |PAMILYA NGAN KAMATUORAN
Usa nga Inter-Faith Prayer Rally an ginbuhat han nakalabay nga Viernes didto ha Makati. Para han mga inatendir hini, hingyap nira nga mahigawas an kamatuoran mahitungod han iskandalo nga dara han ZTE-NBN deal. labot la han magdirodilain pa nga mga katuyoanan depende han grupo nga nag-atendir. May-ada nanawagan han pag-resign han aton Presidente, may-ada daman naghihingyap nga hiya in mag-agi han impeachment process, ngan iba pa. ***
Ha pagkayana sugad hin nagkakabinahin iton mga Pinoy kay may-ada man daman mga grupo nga nasuporta han Presidente. Sanglit sugad hin makuri hinabo nga pinaagi hin proceso nga gawas hiton itinutugot hiton aton Batakan Balaud an magin pamaagi han pagpalusad han aton Presidente. Ha sugad hini nga sitwasyon sugad hin an hinanabo in matatangpos gud man ni PGMA an iya termino ngada hiton 2010. Kundi an hinanabo daman ada padayon na la nga magkakamay-ada mga protesta ha kakalsadahan ngada daman hiton 2010.
***
Ano gud an rason nga nagsasaramok iton aton nasud? Para han mga nasuporta han Presidente pamulitika la ini ngatanan ngan unta magkaurosa na iton mga Pilipino basi magpadayon an aton kuno nauswag nga ekonomiya ngan matagan hin baton an mga panginahanglan han katawhan. Para han oposisyon, diri matutuman ini samtang an aada ha puwesto in usa nga tawo nga may-ada dudable nga integridad ngan moralidad.
***
Maupay gad ngani an hingyap han mga nasuporta han administrasyon nga magkaurosa ngan magburublig na para han kauswagan han nasud. Hingyap nira nga unta diri na gad magpinan-mulitika an mga aada ha oposisyon ngan maghulat na la han 2010 kun may-ada man nira mga hingyap mahitungod hin pag-Presidente. Pinaagi hini matatagan hin panahon an mga buruhaton sugad han kanan mga Senador nga magpasa hin mga balaud nga makakabulig para han kauswagan han aton nasud ngan makakabaton han mga panginahanglan han mga katawhan. Para ha ira diri maupay ini nga mga imbestigasyon nga ginbubuhat han Senado kay diri lugod nira natatagan hin atensyon an ira mga katungdanan mahitungod han pagataga-balaudnon.
***
Kundi para han Senado diri mahihimo nga magpasibaya hira kun may-ada mga iskandalo nga nahinanabo. Para han oposisyon diri maupay nga magpadayon dida ha puwesto in usa nga Presidente nga dudable an pagkatawo. Para ha ira, importante an mga imbestigasyon kay makakabulig ini para han ira pagtuha hin mga balaud nga makakahatag hin kaupayan han mga Pilipino. Para han oposisyon matutuhay la iton nasud kun magre-resign o mapapaagi hin impeachment iton Presidente. Ngatanan ini basi mawara iton mga pagdududa han iya pagka-Presidente ngan han iya integridad nga magpadayon pa han iya termino ngada han 2010.
***
Nagkakabinahin an mga Pinoy mahitungod hini nga mga isyu. Siyempre an mga nasuporta kan PGMA nadiri han mga ginbibinuhat han Senado ngan han oposisyon. An mga nadiri kan PGMA gi-uugopi naman han ira mga ginbibinuhat. Sanglit sugad hin masamok gud talaga iton nanhihinabo.
***
Pero masayon gad la udog iton solusyon hini kun an aton katuyoanan nga mahigawas gud man iton kamatuoran pero makuri para hadton mga nadiri nga mahisabtan ini. Kun diri iginpagawas an EO 464 ngan gintugotan an mga miembro han gabinete nga mahisumat an ira mga nahibabaruan, human na siguro ini nga mga imbestigasyon. An nahinanabo sugad-sugad hin may-ada gintitinago han Administrasyon nga nagigin okasyon lugod para magduda an mga taga-oposisyon ngan magbuhat hin mga imbestigasyon ngan iba pa nga mga buruhaton sugad han panawagan nga hiya in lumusad ha puwesto.
***
Kaurogan nga nagigin samok hiton usa nga institusyon, organisasyon, programa, proyekto o buruhaton kun may-ada mga butang nga gintitinago o diri iginpapasabot hiton kadam-an nga nahidadabihan bisan kun ini in makakaapekto han ngatanan. Bisan ngani iton mga personal nga mga butang in angay ipahibaro han iba kun ini in mamamay-ada kalabutan han maupay nga pagdalagan han grupo o programa. Sugad na la han tagsa nga assets and liabilities han mga nagseserbisyo ha gobyerno. Bisan kun ini in pribado nga impormasyon ngan danay delikado, diri puede nga diri igpasabot han ahensya.
***
Sanglit kun karuyag manggud han administrasyon nga umukoy na ini nga mga imbestigasyon ngan mga samok ha kalsada, unta igpagawas nira an ngatanan nga may kalabutan hini nga mga iskandalo. Kun waray angay igtago, kay-ano nga kinahanglan magpugong han pag-gawas han kamatuoran. Kun diri hira nahadlok han mga igsusumat ni Jun Lozada ha Senado, kay-ano nga matugot hira nga diri ini hiya pumakadto hadto nga panahon nga nagsusumat hiya hin pagkahadlok mahitungod han pagsumat han iya mga nahibabaruan. Kay-ano nga kinahanglan pa ni Neri pumaugop han Korte Suprema nga diri hiya pagpiriton han Senado nga magpadayon pagtestigo kun waray na gud niya igsusumat nga iba pa? Kay-ano nga kinahanglan pa nga maghimo hin komitiba nga mag-aaram pagbawi han EO 464?
***
Sanglit maupay gud kun hi PGMA na mismo iton maisiring kan Neri nga igsumat niya ngatanan nga iya pa angay igsumat kun ungod man nga wara kalabutan han ira pamilya hini nga iskandalo. Maupay daman kun iya na babawion ini nga EO 464.
***
May-ada nasiring nga kun buwaon ka, kinahanglan gi-uupayi iton imo memorya. Kay iton usa nga buwa basi matahuban kinahanglan hin iba pa nga mga buwa. Diri na naton kinahanglan maghimo hin ehemplo kay maaram ako nga haros ngatanan ha aton in nakapagbuwa na, o padayon pa nga nagbibinuwa. May-ada pa nasiring nga iton buwa kuno in sugad hin mas komportable kontra hiton kamatuoran. Damo ha aton iton napipiritan magbinuwa para la diri makahatag hin diri maupay nga pag-abat hin iba nga tawo bisan kun ha kamaihaan mahihibang lugod naton hira sugad na la kun nasiring kita nga mahusay o gwapo iton usa nga tawo bisna kun diri.
***
Kun babalikan naton an kasaysayan han mga siyahan nga mga tawo, usa han mga importante nga mga lesyon nga ira iginhahatag han ira mga kabataan amo an pagsumat han kamatuoran. Waray nasud o tribu tikang pa han tinikangan nga nagtutdo han ira mga kabataan nga magbuwa. Kumbaga usa nga natural o normal nga butang iton hingyap nga mahibaruan iton kamatuoran. Iton pagbinuwa in usa nga butang nga nakakahibang han maupay nga relasyones han mga miembro han tagsa nga komunidad ngan han mamadako nga sosyedad.
***
Importante ini para han aton pagpadukwag han pamilya. Usa nga harigi han marig-on nga pamilya nga pundasyon han makusog nga republika o nasud an kamatuoran. Kun an usa nga pamilya in diri naggigisumat-sumat han kamatuoran ngan waray na paggitapod-tapod, hibang gud man an pundasyon han komunidad. Waray sama hiton kamatuoran. Bisan kun danay nakakadara ha aton ngadto hin masuol nga penalidad o maraut nga kamutangan, kahuman hini mahuyayag na an aton mga kaburut-on. Diri sugad kun may-ada mga buwa nga ginhihimo nga kinahanglan pa pagdinugangan basi diri mahibaruan. Sanglit nagtitinikadamo nga buwa an nahihimo ngan ha kaurhian mamadako nga rimalaso an naabot.
***
Ngan an pinakaimportante han ngatanan, usa nga tigaman han pagtoo sa Diyos an pagtindog ha kamatuoran. Kay maabot iton panahon nga ngatanan kita matindog ha Iya atubangan ngan magbabaton han aton tagsa nga kinabuhi. Adton mga nagbasol han ira mga buwa nga nahimo in may kapasayloan nga andam. Adton mga tawo nga ngada han ira kamatay in nagtipig han mga buwa nga ira ginhimo ngan ginbuhat piho la nga may kabalyo nga kasakitan. Para hadton diri natoo sa Diyos, diri ini angay kahadlokan. Pero hadton natoo nga may-ada Diyos, ini in usa nga kamatuoran nga angay pagtipigan. Ngan an kada pamilya nga naghihingyap nga magin tuhay an sosyedad angay la magtutdo ngan magpakita hin ngan han kamatuoran han ira mga anak!
***
Para han iyo mga komento, suhestiyon, paki-ana, reaksiyon, ngan iba pa, aadi an aton email address: es.reporter@gmail.com ngan save.family.movement@gmail.com . Puede gihapon ako niyo makontak ha numero 0921-4946612 ngan ha mga email addresses nga lance.meryes@gmail.com , ngan pilgrimlance@yahoo.com. Bisitaha gihapon niyo an aton web pages nga http://saveakidneyfund.googlepages.com/home ngan http://save.family.movement.googlepages.com/home . An iyo tambulig in dako an mahihimo basi masalbar an iyo ubos nga sangkay tikang han mamagrabe nga sakit ha kidney ngan magigin tinikangan ini han aton pakabulig han iba pa naton nga mga kabugtoan nga nagkukuri dara han sakit ug kapobrehan. Damo nga salamat ngan bendisyonan kita ngatanan han Makagarahum nga Diyos!
===
Lance AC Acampado A dedicated family man, a former cadet, an ex-seminarian, youth minister, public servant, blogger and regular contributor to the Eastern Samar Reporter.
