Sugob ni Longino (03-19)
March 30th, 2008 | by Lance AC Acampado |Semana Santa ngan Pagkabanhaw
Paggawas hini nga mantalaan, human na an Semana Santa. Kundi hinihimo ko ini nga okasyon basi mahipasabot han ngatanan kun kay-ano nga iton aton taramdan in gintitulohan nga Sugob ni Longino.
***
Subay han istorya, hi Longino in usa nga Romano nga centurion o opisyal han puwersa militar han Imperio Romano. Hiya in usa nga sundalo nga iginhiagi hin damo nga mga araway ngan ha usa nga okasyon in nabutahan han iya usa nga mata. Ha kamatuoran diri eksakto nga ngaran hini nga punoan han mga kasundalohan an ngaran nga Longino o Longinus. Ginamit la ini tungod nga an bangkaw o sugob ha pinulongan nga Griyego in gintatawag nga lonke (longke) sanglit an Longino nangangahulogan nga paragbangkaw o may dara nga bangkaw o sugob.
***
Subay han nahasurat ha Evangelio, han natipagab-i na, ginhangyo hi Pilato han mga Judeo nga ipatanggal na an mga lawas han mga iginraysang ha krus kay basi diri madum-itan an ira pagsalin-urog han adlaw nga iparahuway, an Sabbath o Sabado nga adlaw. Ginpangunahan hin usa nga opisyal han kasundalohan an pagtanggal han mga lawas. Ini nga punoan han kasundalohan in may guti nga kapansanan, buta an iya usa nga mata. (Ha iba nga istorya, pareho an iya mga mata in natikaharani na mabuta.) Antes nira pananggalon an mga lawas, ira anay ginsiguro kun mga patay na an mga iginraysang ha krus. An duha nga mga kawatan in mga buhi pa sanglit pinanmari an ira mga tiil.
***
Pag-abot han Ginoo JesuCristo, nakit-an nira nga patay na ini sanglit imbes nga ira bari-on pa an Iya mga tiil, an punoan nga sundalo in kinuha han iya bangkaw ngan ginsugob an kagiliran han Ginoo. Ngan hinagos an dugo ug tubig tikang han Iya kagiliran, natamsikan an mata han punoan nga sundalo ngan an iya (natika)buta nga (mga) mata in milagro nga kinita na.
***
Tungod han milagro, nagin usa nga Cristiano an punoan nga sundalo ngan ginngaranan hiya nga Longino dida han istorya han Singbahan nga Romano Katoliko. Subay hin usa nga istorya, ini hiya in ginpapugotan han ulo han mga Judeo tungod nga waray hiya karuyag magbuwa tungod han milagro nga nahitabo ha iya. Karuyag han mga Judeo nga hiya in diri magpinan-ngistorya nga tungod han dugo ug tubig ha kagiliran han Ginoo JesuCristo an nagin kawsa han iya pakakita na hin utro. Ini nga istorya in ginsasalin-urog ha Marinduque dinhi ha Pilipinas pinaagi han Moriones Festival.
***
Damo an nagdududa han kamatuoran mahitungod hini nga istorya. Bisan kun natuod an kadam-an mahitungod han nahasurat ha Bibliya mahitungod han pagsugoba han kagiliran han Ginoo JesuCristo, an iba nasiring nga an mga detalye nga iginsusumat han Singbahan in sobra na ngan diri na angay tuohan. Para ha ira usa nga buwa an kadugangan nga mga detalye mahitungod han kinabuhi ni Longino o para han Singbahan, ni San Longino.
***
Ini nga mga intriga in diri na naton pag-iiniristoryahan dinhi. Para han iyo Sugob, an importante amo nga nagkamay-ada pagbabag-o hin usa nga tawo tungod han nahinabo ha iya nga milagro. Asya ini an katuyoanan han aton Sugob, nga mapukrat an mga mata han katawhan ngan pinaagi hin iyo igkasi makasasala in magkamay-ada pagbabag-o dida han aton mga kinabuhi nga makakatikang hin mga pagbabag-o han aton sosyedad.
***
Diri la an mga pisikal nga mga mata hin tawo an angay nga mapukrat tungod han dugo ug tubig nga inawas tikang han kagiliran han Ginoo tungod han sakripisyo ngan kamatayon nga Iya gin-agian para han katalwasan han katawhan. An mga ispiritwal ngan moral nga mga mata naton ngatanan in angay liwat mapukrat basi magpakakita han kamatuoran ngan magsunod han matuod nga dalan. Damo ha aton an nag-uukoy ha kasisidman han sala, personal ngan sosyal nga mga sala, ngan ini ngatanan in nakakapugong han aton pakakab-ot han ungod nga kalipay ngan kauswagan nga an Diyos la an makakahatag. Yana nga panahon nah an Pagkabanhaw, hinaut unta nga an aton mga kinabuhi nga nakada han kasisidman tungod han sala in nahiupod hank an Cristo pagperdi han kamatayon!
***
Mahugasan unta han dugo ug tubig han Ginoo JesuCristo an aton mga kalugaringon ngan sugad hadton punoan nga sundalo nga aton ginngaranan nga Longino, magin andam kita hin pag-atubang han mga ayat han kalibutanon nga mga puwersa ngan maghalad kita han aton mga kinabuhi para makit-an han katawhan an kanan Diyos kahimayaan. Ha kada adlaw han aton mga kinabuhi, damo an mga kasisidman nga aton gin-aagian, damo an karat-an nga magdadara ha aton ngadto hin pagbaya han kamatuoran. Kundi kun kikilal-on naton an gahum han Diyos, ngan kun andam kita mamatay ha kada adlaw han aton kinabuhi hin kamatayon tikang han mga pankalugaringon nga mga ungara ngan mga hingyap, sigurado ko nga an kinabuhi nga iginhahatag han Diyos in aton matatagamtaman.
***
Dayawon an Diyos han Iya mga grasya nga iginhuhura pinaagi han aton Ginoo JesuCristo nga nabanhaw tikang han mga minatay!
***
Padayon naton nga ig-uundong an kaupayan han pamilya ha magkadiro-dilain nga aspeto han kinabuhi ngan sektor han sosyedad. Usa ini nga tigaman han aton pagtoo nga ha butnga hin dmao nga impluwensiya ngan mga elemento nga nagtutuyo nga paghibangon an dignidad ngan establidad han pamilya nga danay nagamit hin mga pamaagi nga ha siyahan nga naton nga pagkita in maupay ngan makakabulig ha aton, aada la gihapon an kamatuoran nga igintututdo han Diyos ngan diri gud man Hiya matugot nga an pamilya nga Iya ginSantos pinaagi han katawo han Iya bugtong nga Anak nga hi JesuCristo aton Ginoo in mahibang.
***
An mga panhinabo nga gin-agian han iyo ubos nga sangkay in nagin ayat nga magpadayon hini nga buruhaton pag-undong han dignidad han pamilya. Bisan kun kita in aada hin sitwasyon nga masiring an iba nga haros igbalyo naton an aton prinsipyo basi la mabuligan kita han aton ginkikinahanglan tungod han aton kamutangan, diri mahihimo nga pagtamaktamakan an kamatuoran. Kun kinahanglan magsakripisyo para han kaupayan ngan kamatuoran, bubuhaton naton basi diri mapudngan an pag-undong han katuhayan ngan katadungan.
***
Sanglit padayon an pagtindog naton para han kamatuoran ngan han kaupayan ngan katadungan han pamilya. Diri mapupudngan an tingog han pamilya kay ini in tingog nga nasarig han kusog han Diyos kay an hingyap ngan ungara naton in makakahatag hin kadarayawan han aton Ginoo. Yana nga panahon han Pagkabanhaw an grasya han Diyos in maggigiya ha aton ngadto han tinuod nga katalwasan ngan waray katapusan nga kalipayan ngan kinabuhi.
***
Para han iyo mga komento, suhestiyon, paki-ana, reaksiyon, ngan iba pa, aadi an aton email address: es.reporter@gmail.com ngan save.family.movement@gmail.com . Puede gihapon ako niyo makontak ha numero 0921-4946612 ngan ha mga email addresses nga lance.meryes@gmail.com , ngan pilgrimlance@yahoo.com. Bisitaha gihapon niyo an aton web pages nga http://saveakidneyfund.googlepages.com/home ngan http://save.family.movement.googlepages.com/home . An iyo tambulig in dako an mahihimo basi masalbar an iyo ubos nga sangkay tikang han mamagrabe nga sakit ha kidney ngan magigin tinikangan ini han aton pakabulig han iba pa naton nga mga kabugtoan nga nagkukuri dara han sakit ug kapobrehan. Damo nga salamat ngan bendisyonan kita ngatanan han Makagarahum nga Diyos!
===
Lance AC Acampado A dedicated family man, a former cadet, an ex-seminarian, youth minister, public servant, blogger and regular contributor to the Eastern Samar Reporter.
