San Isidro: Patron Boronganon!
April 4th, 2008 | by Caralido |Pag-aabot hit summer, damo la nga iba iba nga mga aktibidades iton sinusodlan ngan ginhihimo hiton mga Boronganon. Sugad hit iba nga mga lugar ha Pilipinas, ginhihimo iton mga family reunions, mga alumni homecomings, mayda mga paurugyas para hiton kabataan, mayda Virgenes ha Singbahan, mayda Santacruzan, damu it nasingabot panmisita ngan pamasyada ngadto hin mga lugar nga kun diin it ira pagbakasyon in bug-os nira nga ikalilipay upod it pamilya ngan kasangkayan.
Pero iton orihinal nga Boronganon in mayda dire hingangalimtan nga okasyon hiton summer. Okasyon nga ginpundar han mga kaapoyapoyan, nga gin-hiaraan ngan yana in parte na hit kultura hit Borongan. Usa nga okasyon, nga para ha damu nga Boronganon in asya na an naging kahulogan han summer nga bakasyon. Ngan ine waray iba kundi an pagsalin-urog han Patron ni San Isidro de Labrador, an patron han mga parag-uma. An Patron han kakalsadahan han Borongan.
Ine nga pagsalin-urog ngan pag debosyon kan San Isidro in nabalik ngadto hin pira ka yukot ka tuig na nga naglabay. Ine in kaupod han istorya han pagtikang ngan pag-uswag han Borongan ngan Boronganon. Dire na siguro yana damu it nakakaintiende han ka importante han pagpahinungod kan San Isidro han aton mga apoy han una nga panahon. Ini in usa nga tigaman han natural nga pagka mainampuon han Boronganon. Ine in tigaman liwat han pagiging aktibo ngan pagiging importante nga mga miembros han sociedad han kada tagsa. Ine in tigaman han natural nga pagkamalipayon han pagkatawo han Boronganon.
Pero damu liwat an nasiring nga an San Isidro in pagpamatuod la han dire na kaangayan nga batasan hin sobra nga pagka garboso hiton taga Borongan. Mayda daman iba nga nasiring nga ginwawara na iton ungod nga pagpahinungod han selebrasyon ngada kan Senor San Isidro. Mayda pa gud iba nga it pagkulaw in sugad nala ine hin bisyo o negosyo, okasyon hin pag-irignum ngan pagpakita hiton aton mga nagkatitigayon.
Pero bisan ha kadamu nga magkadirudilain nga pagkulaw hiton San Isidro, an ngod nga Boronganon in maaram nga iton habagat…panahon han Patron han kakalsadahan han Borongan! Usa nga okasyon nga puro ngan hul-os nga Boronganon!
===
Caralido Just another aspiring writer who once showed a lot of promise but got lost in translation because I didn't want to impress, just fully express!
One Response to “San Isidro: Patron Boronganon!”
By Maverickjockey on Apr 5, 2008 | Reply
Guti-ay la nga correction hene nga post: “…pira ka yukot ka tuig na nga naglabay…” akon gin-ihap tikang han primero nga pagsagka han mga Kastila dinhe ha Pilipinas han tu-ig nga 1521 ngada yana, 487 ka tu-ig pala an naglabay ngada yana, waray pa ngani pagsaka-yukot. Hinay-hinay la, kun baga ha English, you’re getting carried away. Amola.