Pa-agi han paniday
Na-ano an sayaw han imo paniday
Ngan kumpas han yakan han im pan hulagway
Ino-unan-o ngani adton pag pahamtang
Hini nga hinimo nimo nga kabutang
Ipina-agi ba han im sukol sukol
Aber han pag tak-um in mag uru-untol
O kun gin irigba adton nu-on du-on
Bas an magbarasa mag igba an baton
Ini ba inupat adton pag parapdis
Nga an katapusan papriho an wiswis
O kun pinbay-an adton ngawas-awas
Hadton huna huna hadton pagkagawas
Ginsunod ba nimo adton de katorse
O kun an nahundong an butnga ha onse
Hinubad ba ini tikang han kada-an
O kun igin hitso hadton kabag uhan?
Tapos an hinungdan hini an paghimo
Hin-o nga palaran an ha im nag sugo
Ini ba in gugma o kun kasurub-on
O kun binuhatan hadton tulin naton
Han kadamo nala nga baga pa-agi
Aber adton mahimo nga tangsi
Nga andam ighukot bis ano nga hugna
Nga hin makasikop han sasrang nga gugma
Kadamo hin kusog nga halad nga gudti
Basi mag himangraw an ngula nga tamsi
Nga hina-ot unta di la panilhigon
Ngan dithon ha ligid madunot hin dayon.
john d simborios
taft e samar
5-28-2001, 10:15 pm
John Docena Simborios is usa nga Tubignon ha Esti han Samar, Paragsiday (poet), President of the KAMAREO (Katig-Uban han mga Magsusurat ha Rehiyon Otso), Journalist, Former Student Leader and like to talk about Nationalism and Idealism.
Email this author | All posts by John Docena Simborios