An Tinuod nga Pagsalin-urog han Pasko
By Lance AC Acampado • Dec 22nd, 2008 • Category: Artsan bulan han disyembre in puno hin kalipayan
ini makikit-an labi na ha bayhon han kabataan
kay an bulan han disyembre iginahin han ngatanan
panahon hin pagsalin-urog kanan Ginoo naton natawhan
kundi agsob di la danay naton nahingangalimtan
an sagrado ngan mahinungdanon gud nga kamatuoran
nga an adlaw nga ginpapamulat pasko naton ginngaranan
kanan Diyos pagpakita dako nga gugma han katawhan
pagpaid ngan panginano kanan Diyos tuyo hadto
pagparad-an han Iya bugtong nga anak aton Ginoo
basi naman matalwas ngan malibre tanan nga mga tawo
tikang han sala nga panurundon, mahigawas kita han kalayo
kalipayan ngan pagrayhak tungod hini nga Iya panginano
an angay unta nga katuyoanan pagsalin-urog hinin pasko
pagbaya han sala ug karat-an ngadto hin pagbabag-o
ngan mag-ukoy hin baraan nga kinabuhi ngan may pagto-o
kundi yana nga panahon sugad hin nag-iiba na
an pasko sugad na la kanan negosyante pag-ungara
an mga tawo nalilipay la kun nakakakarawat na
regalo nga marahalon, garastuson naman nga kwarta
tinuod gad nga kinahanglanon hini nga panahon yana
materyal nga mga butang – ini in di maididiwara
kundi bis pa man an’on angay gad la gihap naton makita
labaw gihap han ngatanan kanan Diyos pagpasaylo, Iya gugma.
sanglit angay naton ini yana paghunahunaon
ha panahon han pasko kita ngatanan manmalandong
waray sama han nakilalala han Diyos nga Makagarahum
ngan nagpapasige kasingkasing nga mapinasalamaton
tikang yana ibalik ta ungod nga tuyo han pasko
gugma, paglaum, pagpaid, pagpasaylo, ngan panginano
pagpaura han aton Diyos nga Iya iginhura hadto
igpaangbit naton kada adlaw han aton mga igkasi tawo
Lance AC Acampado is Presently a columnist - sugob ni longino - in the local paper, ES Reporter, and a blogger - http://sugobnilongino.blogspot.com . Also works at the City Government of Borongan, a family man, and a former cadet, seminarian and youth minister.
Email this author | All posts by Lance AC Acampado
Ipadara ini ha DYVL Puplonganon/Siday, madaog ini ha ira paisan-isan. =)
Thanks. Di padama ak maaram hini nga ira paisan-isan. Uunan-on ko dawla pagpadara? Ty
Poydi maghulog hin surat ha ira. Aadi an ira address:
Corner Real and J. Romualdez Streets, Tacloban City,
6500, Leyte
Poydi gihap hira mahibatian ha Radio Online. Kada 7:30 han aga madudungog an Siday. Bisita ha http://www.evonline.net.ph.
Malipayon nga kapaskohan! =)