Pasko na gud man.
Nasiring an iba nga iton Pasko kanan mga kabataan. Kadam-an ha aton in makakasiring nga tinuod ini kay bisan hi ako sugad hin diri na ura-ura nga naabat hin karisyuhan o excitement nga sugad han mga nakalabay nga panahon. Baga nawara na an romántiko nga pagkita han Pasko ngan sugad hin pagtuman na la an ngatanan.
Usa siguro ini nga tigaman kun ano gud man an kan Cristo sinisiring nga an ginhadian han Diyos in para han kabataan. Iton bata malipayon la ha butnga han mga problema nga gin-aagian han katigurangan. Guti la nga kaupayan nga imo maihatag o maipaangbit hiton bata, kuntento na hiya ngan. Makapanarit o makag-caroling la yana nga kapaskohan ngan makakakarawat bisan la piso, mahiyom-hiyom na. Pero an tigurang, bisan nakakakarawat na hin extra bonus, bitin pa!
Oo gad ngani, iba naman an responsibilidad han tigurang kontra han kabataan. Pero usa ini nga butang nga angay naton ipanmalandong. Kay-ano nga ura-ura na hin kadako an panahon nga iginhahatag han katigurangan hin mga butang nga diri kaangayan paggamitan han iya panahon? Ngan ginkakalimtan naman an mga butang nga angay niya tagan hin atensyon? Pira dawla yana nga mga amay an hinunumdom pag-upod han pamilya ngadto ha singbahan ngan pira naman an makakahimo hingalimot han bublangan? Pira nga mga nanay an mahinunumdom pag-ampo upod an pamilya ngan pira an mamaurugon an pakigharampang han mga kasangkayan o bisita? Pira nga mga Cristiano an mahinunumdom han karuyag sidngon han Pasko ngan igpasamwak ini han iya igkasi-tawo?
Damo ngan dako an responsibilidad han katigurangan. Pero danay nahingangalimtan an pinakadako ngan pinakaimportante nga rason han ngatanan nga mga pagbudlay: an paggiya han kabataan nga magin maupay ngan tuhay nga mga anak han Diyos. Ha aton pagtalinguha nga matuman an aton mga responsibilidad komo mga katigurangan, nahingangalimtan naton an imbitasyon han aton Ginoo, an pagbiling han ginhadian han Diyos ngan han Iya katadungan. Di ba nagsaad Hiya nga kun matuman naton ini, Iya ighahatag an ngatanan?
Balik kita han pagin mga bata (childlikeness) – diri an pagbinata-bata (childishness) basi naton masudlan an Ginhadian han Diyos ngan maabat an tinuod Niya nga gahum basi makagsalin-urog kita han Pasko nga may ungod-ungod nga kalipayan ngan may mga kasingkasing ngan panhunahuna nga nasarig ha Iya ngan natoo ngan naglalaum han Iya gugma ug kamakisasangkayon!
Maupay nga Pasko ha aton ngatanan!
- Sugob ni Longino, ES Reporter 12-21 to 27
Lance AC Acampado is Presently a columnist - sugob ni longino - in the local paper, ES Reporter, and a blogger - http://sugobnilongino.blogspot.com . Also works at the City Government of Borongan, a family man, and a former cadet, seminarian and youth minister.
Email this author | All posts by Lance AC Acampado
Malipayon nga kapaskohan ha iyo ngatanan!
(Pasinsya na Ced kun waray ak maka reply ha im text. Krisis kita yana. Ha ha ha!)
Hehe. No prob. Merry Christmas ha iyo ngatanan!
Christmas is the sound of peace…
pEace be wIth U
i reaLLy miSSed tHe tOwn i Grew up…………………..mzi’n tHe pLacE so much
maybe you could pay a visit sometime in the future